Għeżież ħuti,
Fuq l-eżempju ta’ San Franġisk, li kien iżur l-irħula tal-Italja biex iwettaq lin-nies fil-fidi u jħeġġiġhom għal ħajja aħjar, aħna l-patrijiet, sorijiet u lajċi franġiskani se niġu nżuru l-parroċċa. Waħda mit-Twissijiet li Missierna San Franġisk kiteb hija dwar kif l-Ispirtu tal-Mulej jaħdem fina.“Il-qaddej ta’ Alla jingħaraf jekk għandux fih l-Ispirtu tal-Mulej minn dan li se ngħid: jekk meta l-Mulej jagħmel xi ħaġa permezz tiegħu, hu jibqa’ ma jitkabbarx bih innifsu, għax il-ġisem jeħodha dejjem kontra dak kollu li huwa tajjeb. Imma f’għajnejh stess iqis lilu nnifsu bħala bniedem li ma jiswa għal xejn, u jħossu konvint li hu l-iktar wieħed miżerabbli mill-bnedmin l-oħra kollha.”
Għalhekk Alla, li ma jagħmel xejn għal xejn, imexxina fi triqatkom. Inti lest li tisimgħU?
Matul din iż-żjara, aħna se nkunu ta’ servizz għalikom bħala Aħwa li nitolbu flimkien magħkom fil-Parroċċa; inkunu ta’ servizz fiċ-ċelebrazzjoni tal-Ewkaristija u tas-Sagrament tal-Maħfra; ikollna laqgħat ma’ diversi gruppi, mumenti ta’ talb fid-djar tal-familji u mumenti ta’ żjarat u djalogu mal-familji.
Nittamaw li lkoll tilqgħu din l-esperjenza bħala sinjal tal-ħniena li Alla l-Missier qatt ma jieqaf juri magħna. Nitolbukom sabiex minn issa tingħaqdu magħna f’talba waħda għall-ġid spiritwali ta’ din iż-Żjara Franġiskana fostkom speċjalment issa li qed niċċelebraw il-100 sena mit-twaqqif tal-Parroċċa.
Il-Mulej jagħtikom is-sliem!